و في الآخر
Posted by Maioush . Published on 10 September 2024
وبعد ما يمر وقت كافي، الواحد بيدرك إنه مش بحاجة لحد يدلّعه ويطلّعه ويجيبله هدايا ولا يحكي معه عَ التليفون. و احتياجه بالعلاقة، أو زي ما الشباب هلأ بسمّوها “الريليشنشيب جولز”، بيتلخّص بحدا لطيف قادر يستوعب سخافتك بعد الشغل، ويعرف لحاله عجزك قدام سؤال “شو بدك تاكلي؟” بدون ما تسألي، لأنه مهتم و عارف
حدا يتقبّل حبك المجنون للكوميكس وأي شي آخره “ساركازم سوسايتي”
حدا بيخلينا نتصالح مع الدنيا والمستقبل، وإحنا نصالحه مع ربنا والماضي. مش ضروري يشوفنا أحسن ناس بالعالم، بالعكس، شايف قرفنا عادي، ومش بالضرورة يقدر يحتويه كله، بس على الأقل بيحاول
حدا يعطينا المساحة نكون إحنا، وبوجوده الحنون واللطيف، نتعلم كيف نكون إحنا أصلاً