أسكتوووو، مش غيروا بلاط المول!!!!
Posted by Maioush . Published on 30 October 2008
مبارح و لأول مرة بجرب قعدات “النسوان” و يا وردييي على إلي صار فيي، بعد ساعة من الوقت،مستوى الذكاء تاعي صار تحت الصفر من كثر ما سواليفهم فارطة وتافه
هادة يا سادة يا كرام رحت أسلم على وحده اجت من السفر، كانت مسافره وقت ما أنا اجيت على سياتل، المخلوقة طلعت عامله عمليه هناك، فقلت لحالي يا بنت خلي عندك ذوق وروحي إنتي تعرفي عليها
حكيت مع وحده من البنات إلي بعرفهم هون وطلبت منها انها تاخدني و نروح مشان أتعرف عليها و أهنيها بالسلامة، قام شوووووو طلعت هديك الست عامله جمعت نسوان ولامه كل نسوان الحارة، و محسوبتكم طبعاً ما إلها على هادي الحركات بالمرة، قلت ماشي يلا مش غلط، بس طلعت غلط وستين غلط كماااان، يا خرابي على إلي صار
قعدوا البنات عفواً النسوان و عينك ما تشوف إلا النور،على قصص سخيفه، مين اشترت أغلى بلوزه، او إلي زنّنّنّت على زوجها لحد ما جبلها طقم الكنبايات أبو ال- ١٢٠٠٠ دولار لأنو كتير طالع موضة السنه، و أنا قاعده يا غافل الك الله، بستنى يحكووا اشي مفيد، أبداً!!
أنا عاد متى ولعت معي؟؟ لما قعدوا أكتر من ٢٠ دقيقة يحكوووا للي اجت من السفر كيف انهم غيروا بلاط المول بغيابها، وهديك زي إلي حكيتلها إنو رايح عليها اشي كتير كبير… الله أكبر، ٦ بنات قاعدين بحكو عن بلاط المول؟؟؟ ليه؟؟ مافي اشي تاني بالحياه نحكي عنو غير وين صرفوا فلوس ازواجهم والأشياء التافهة التانيه…
يي صحيح نسيت أحكيلكم عن مشهد تنتيف وبر الوحيده إلي مش موجوده معهم، وكيف إنو هي ما بتفهم ومو منيحه وما بعرف شو بتعمل كمان، لأنو أنا صراحة بطلت اركز بعد هيك، فما بعرف شو حكوا كمان
أنا أخدت قرار ، مدام إني عارفه حالي مش خرج سواليف النسوان ليه بعمل بحالي هيك؟ لا زيارات نسوان بعد اليوم، إذا كتير حابه اني ازور، بسحب حالي و بروح ازور العالم مع زوجي، ساعة زمان، كيف حالكم، شكراً على ضيافتكم، و سلام ، أما اني أضيع ٣ ساعة من نهاري على سواليف فارطه.. لأ وألف لأ
و الابلى من هيك إنو كل وحده قاعده تلعن ابو أفطاسه لزوجها، تعال احكي لوحده فيهم، قومي اشتغلي وساعديه، بتقلك ليه هو أنا ما بكفيني شغل البيت!! ولك أي بيت هادا و إنتي حتى بلاط المول صار عندك قصة.. آاخ بس، أنا مبارح بس اكتشفت اني غير مؤهله اني أعد بالبيت بدون شغل
هاف أ نايس ويك اند…
October 30th, 2008 at 1:50 PM
October 30th, 2008 at 1:53 PM
October 30th, 2008 at 9:15 PM
October 31st, 2008 at 1:42 AM
November 1st, 2008 at 1:33 AM
November 1st, 2008 at 9:35 AM
November 7th, 2008 at 7:31 AM
November 17th, 2008 at 4:30 AM
November 19th, 2008 at 1:30 AM
January 11th, 2009 at 8:30 AM